مناقشة حول مشكلة الصناعة الوطنية المصرية

مناقشة حول مشكلة الصناعة الوطنية المصرية

مشكلة الصناعة الوطنية المصرية - اسباب وحلول

الكلام ده من واقع تجربتى وسيتم الرد على كلام الجميع ..
 * هل الصناعه الوطنيه صح وموجوده فعلا بصفة عامة ولا لا
  للاسف لا ... و الاسباب واضحة و معروفة ..
 *  ان الصناعه الوطنيه معظمها منتجات رديئة جدا و كفائتها لا تقارن بالصناعات الاخرى ده بسبب اننا متخلفين تكنولوجيا..
لكن بالرغم من ذلك عندنا مهارات و عقليات بتتغلب على الفرق دا بالامكانيات المتاحة وممكن توصل بيك لفرق بسيط فى جودة المنتج وتقلص الفرق التكنولوجي وده موجود على الاقل فى الصناعات الصغيرة.

  * جشع التجار والمصنعين وده اللي بيخليه يسترخص في الخامات ولا يهتم بالشكل او حتى المضمون (اهو تيليفزيون ولا اي جهاز والسلام)

فعلا موجود لكن للاسف دى ثقافة شعب مش جشع تجار انه اى منتج والسلام ومحدش بيراعي الجودة ومحدش بيعمل بمبدأ ان ( الغالى رخيص والرخيص هو اللى غالي ) والدليل ان التاجر اللى محله فى بضاعة مضروبة فى معظم الاحيان بتلاقى بيته كمان معظمه من نفس الفئة.
واللى بيجره اكنر على كدا المستهلك اللى بيدور على الرخيص بغض النظر عن الجودة.
 *  الدماغ المصريه اللي زي الفل اللي ما عندهاش ثقافة الاتقان في العمل.                                                                                                                                           
يعني لو الورديه معادها انها تبتدي من الساعه 8 . ف8 دي هتتاجل ل 9 او 10 على ما العمال ييجو ويفطروا وبعدين يحبسوا بكوباية الشاي التمام...
عشان يشتغل وهو مروق كده ومزبط الجمجمه.
اذا عندك تاخير في وقت عمل الورديه هيحاولوا او لا انهم يعوضوه بالسرعه في العمل وده يؤثر سلبا على ناتج الجوده.

دي مشكلة ادارة فى المصانع اللى حجمها متوسط وصغير.

اما المصانع الكبيرة بيكون شيه منعدم لان فى حاجه اسمها ادارة جودة بتراقب

و فى مصانع على مستوى عالمي وبتصدر انتاجها لخارج مصر وعلى فكرة كتيييييييييييير اوى

توشيبا العربي

مثلا

ومصانع تانية يمكن تعرفوها او لا هذكرها وابحثوا عنها فى النت وشوفوا كلامى صح ولا غلط

السويدي للصناعات ودى مجموعة جبارة مجالاتها فى الاسلاك الكهربائية والبلاسنيك

ميد استار يلاستيك

فيليكس ادوات كهربائية

و مصانع كتير اخرى بتصدر ومننجها مطلوب فى دول خليج وعربية و فى بعضها فى اسيا وافريقيا

سؤال مهم :-
ايه سر تطور الصناعة في الصين؟ 
وليه العامل الصيني (و أي دولة في جنوب شرق آسيا ) أفضل من أي عامل في أي مكان في العالم؟!
 لدرجة تخلي شركة أبل و معظم (إن لم يكن كل) الشركات في أمريكا و غيرها في دول العالم تصنع منتجاتها هناك؟! ....
العامل هناك بيموت نفسه في الشغل و بيقنع بالاجر القليل مقارنة بعامل زيه في دولة تانية ...

الضمير و هو كلمة السر في أى حاجة ...لو مفيش ضمير و معاك أحسن عامل و أحسن ماكينات برضه ولا حاجة ...

 أجر عامل بيقلل التكلفة و بالتالي يضرب السعر هنا في مصر و كمان امكانية ان اى حد يقدر يصنع اي حاجة تخطر في باله ...مجرد ما يروح لاي مصنع و يقوله عايز اصنع دي ....فأي مصري بيقول أروح الصين و تتعمل أحسن و أرخص و بكل المواصفات اللى انا عايزها ...((لكن هنا فشل و سعر غالي كمان))

الصين معندهاش ضمير برضه

مش الضمير هو الحكم

الدولة هى الحكم

فى التسعينيات

قريت خبر كان بمثابة كارثة علينا وقتها

طلع قرار بتدميركل الاقراص المقرصنة وكانوا بيلموها فى الصين ويمشوا بيها بلوادر علشان يكسروها من كثرتها

الدولة عملت ايه ؟؟؟؟؟؟

لقت ان كل منتج موجود فى العالم اتصنع فى الصين

والعالم اشتكى

( طيب وايه يعنى ما يخبطوا دماغهم فى الحيط ) لكن

ادارة الدولة فكرت بطريقة تانية

احتلال العالم اقتصاديا هيكون اقوى من عسكريا ويقدروا يوصولوا لاماكن الجيوش ماتوصلهاش.
امريكا على سبيل المثال محتلة صينيا بالاقتصاد

جابوا المصانع اللى تحت بير السلم واللى بتنتج ماركات مقلدة وقاله انتج بجوده وهنسوقلك و هنجيب لك تراخيص ومفيش ضرايب وخد كهرباء وخد غاز وخد اللى انت عايزه من موارد الدولة مجانا ارض وخلافه....

المصانع الكبيرة انتج بماركتك وهنسوقها وخد من الصغير وكمل شغلك ( الصناعات التكميلية )

بالفعل اشتغلوا وانتجوا ولحد انهارده عندهم مضروب بس لما حد بيطلبه منهم

انما المنتج الاساسي اللى بيتسوق خارج البلد باسمهم عالى الجودة

انت باه عايزه مواصفات خاصة مش هيعمله باسمه هيعمله باى اسم تانى لكن بحساب وحتى لو كان شوية تراب مادمت هتدفع

احنا محتاجين ايه للخروج من الازمة ؟

اننا كعملاء ندخل نشترى المنتج النضيف ولو التاجر عرض عليك منتج ردئ وحتى لو مفيش غيره ما تشتريش حتى لو محتاجه
سيب المنج للتجار وحسسه انك مش عايزه ما دام مش نضيف وكويس حتى لو محتاجه
واخرج ودور فى مكان تانى واشتريه فى الاخر لو ملقتش الجودة المطلوبة

((( بس بعد ما تكون عملت كدا مع 2 او 3 تجار حسستهم انه لو مش نضيف مش هتشترى فى الحالة دى انا متاكد انه لو رجعت له بعد فترة هيقولك طلبك موجود وانا سالت عليه وجبته بس هو غالى شوية )))

واحدة واحدة السوق هينضف التاجر عايز يبيع ويكسب

ودا بيسموه جشع وهو فى الحقيقة مش جشع دا هو دا اصل التجارة انه يشترى ب5 ويبيع ب 10 وانت لو مكانه هتعمل كدا واللى يخليك تشترى ب 5 وتبيع ب5.5 انه في غيرك عنده نفس الصنف وانت عايز تبيع اكنر يعنى المنافسة

دا بالنسبة للعملاء انهم يطلبوا بالجودة

لان التاجر مش هيجيب بضاعة مش مطلوبة يبيعها

بالنسبة للمصانع
نفس الشئ لما التاجر هيطلب الجودة المصنع هيعملها غصب عنه

ايه مصلحة المصنع انه ينتج اطنان ويركنها عنده ؟!؟!؟!

الاهم من دا كله

دعم الدولة

انت بتشتغل وتنتج فى اشد واصعب الظروف قساوة وكانك حرامي!!

خايف من الضرايب والتموين والمرافق والكهربا والميه  الخ .

وبرضه شغال

الدولة توفر كل دا وهتلاقى الدنيا ولعة من كتر الشغل...

بلاش ...
سيب اللى شغال شغال وهو بيدبر اموره من ناحية الامكانيات

بس ما تطاردهوش!!!

بالنسبة للعمالة
لو المدارس الفنية شغالة صح هيكون العامل بتاعنا امهر العمال على وجه الارض بلا جدال

اذا كان اللى مش بيعرف يقرا ولا يكتب بيبتكر... تخيل لو علمته هايعمل ايه ؟!؟!؟...

من كتر الكلام طارت من راسي نقاط كتير كنت عايز اقولها يمكن افتكرها فى ردود منفصلة لو حد ناقشنى واستحمل انه يوصل لحد السطر دا اساسا..

دمتم فى حفظ الله ورعايته..